Այսօր Ամերիկյան համալսարանի հյուրընկալած «Կանաչ օրակարգ Հայաստան 2025» համաժողովի ընթացքում հրապարակվեց Հայաստանի կանաչ անցման վերաբերյալ առաջին համապարփակ ազգային գնահատման զեկույցը։
Համաժողովը մեկտեղել է կառավարության, միջազգային կազմակերպությունների, գիտական և քաղաքացիական հատվածի ներկայացուցիչներին՝ քննարկելու Հայաստանի կանաչ զարգացման մարտահրավերներն ու հնարավորությունները։
Նոր զեկույցը ընդգրկում է ռազմավարական ոլորտների՝ կլիմայական քաղաքականության, էներգետիկայի, տրանսպորտի, շինարարության, գյուղատնտեսության, արդյունաբերության և կենսաբազմազանության ոլորտներում երկրի ներկայիս վիճակի և քաղաքականությունների համակողմանի գնահատումը։ Զեկույցում առանձնացված են նաև ֆինանսավորման, նորարարության, թվայնացման և կանաչ անցման նշանակալի դերը կանաչ, կայուն և մրցունակ տնտեսություն կերտելու հարցում։
Համաժողովին ելույթով հանդես է եկել  Շրջակա միջավայրի նախարարի տեղակալ Արամ Մեյմարյանը.
«Կանաչ անցման այս համապարփակ գնահատականը կարևոր ուղեցույց է մեր երկրի կայուն զարգացման ճանապարհին։ Այն ոչ միայն ամրապնդում է մեր հանձնառությունը՝ կառուցելու կանաչ Հայաստան, այլև նախանշում է հետագա քայլերը։ Հատկանշական է, որ Հայաստանը 2026-ին հյուրընկալելու է Կենսաբազմազանության մասին կոնվենցիայի կողմերի 17-րդ համաժողովը (CBD COP17), ինչը այս գործընթացին նոր լիցք է հաղորդում»,-նշել է նախարարի տեղակալը։
Զեկույցը մշակվել է Ստոկհոլմի շրջակա միջավայրի ինստիտուտի և ՀԱՀ Յակոբեան բնապահպանական կենտրոնի կողմից՝ Շվեդիայի միջազգային զարգացման համագործակցության գործակալության (Sida) աջակցությամբ իրականացվող «Կանաչ օրակարգ» ծրագրի շրջանակում։ Ծրագիրը նպաստում է Հայաստանի, Վրաստանի, Մոլդովայի և Ուկրաինայի շարժմանը դեպի «Եվրոպական կանաչ գործարքի» նպատակները՝ ԵՄ-Հայաստան CEPA համաձայնագրի տրամաբանության ներքո։
Յակոբեան կենտրոնի տնօրեն Ալեն Ամիրխանյանն ընդգծել է.
«Զեկույցը ոչ միայն գնահատում է Հայաստանի առաջընթացն ու խոչընդոտները, այլև տրամադրում է գործնական ուղենիշներ՝ պետական քաղաքականությունների պլանավորման և ներդրումային նախաձեռնությունների ձևավորման համար։ Մենք նախատեսում ենք առաջիկա փուլում աջակցել 7-8 հիմնական ոլորտների կոնկրետ գործողությունների ծրագրերի մշակմանը»։
Շվեդիայի Թագավորության դեսպանության ներկայացուցիչ Կլաս Վալդենստրյոմը հավելել է.
«Հայաստանի հանձնառությունը՝ անցնելու կանաչ զարգացման ճանապարհով, տպավորիչ է։ Մեր աջակցությունը շարունակվելու է՝ ի նպաստ տնտեսական վերափոխման, բնապահպանական կայունության և սոցիալական արդարության»։
Զեկույցի առանցքային շեշտադրումները ներառում են՝

• Կլիմայի հարմարվողականության խորացումը՝ առաջնահերթ ոլորտներում՝ գյուղատնտեսությունից մինչև ջրի կառավարում,
• Էներգետիկ անկախության խթանում՝ վերականգնվող էներգիայի ներուժի օգտագործմամբ,
• Կայուն տրանսպորտի և էլեկտրաշարժունակության զարգացում,
• Գյուղատնտեսական նորարարություն՝ սննդի անվտանգությունն ու հողերի պաշտպանությունը համադրելու համար։

Զեկույցը հասանելի կլինի լայն հանրությանը և կծառայի որպես հիմք՝ ապագա քաղաքականությունների, ներդրումային ծրագրերի և ոլորտային ճանապարհային քարտեզների մշակման համար։